top of page
Search

InYouS-ը՝ Խարկովում. Օրակարգում երիտասարդական աշխատանքի առաջխաղացումն է


Երիտասարդական փոխանակման ծրագրի շրջանակում մի խումբ երիտասարդներ ստանում են երիտասարդական աշխատանքի վերաբերյալ տեղեկատվական արշավներ կազմակերպելու գիտելիքներ ու հմտություններ։

Հայաստանի Երիտասարդական ակումբների դաշնության նախաձեռնությամբ դեռևս ապրիլին մեկնարկած «Միջազգային երիտասարդական հետազոտություններ» (InYouS) կարողությունների զարգացման երկարաժամկետ ծրագրի շրջանակում Ուկրաինայի Խարկով քաղաքում համախմբվել են Եվրոպայի տարբեր երկրների երիտասարդական կազմակերպությունների ակտիվ ներկայացուցիչներ՝ միմյանց փոխանցելու երիտասարդական աշխատանքի ոլորտում իրենց ունեցած փորձը։


Ծրագրի՝ հոկտեմբերի 26-ից մեկնարկած 4-րդ փուլին մասնակցում են երիտասարդներ ինչպես Հայաստանից, այնպես էլ Վրաստանից, Բելառուսից, Ուկրաինայից, Պորտուգալիայից, Չեխիայից, Բելգիայից։ Այն հնարավորություն է տալիս զարգացնել երիտասարդների հմտությունները երիտասարդական աշխատանքը գրավիչ դարձնող տեղեկատվական արշավներ պատրաստելիս:

Երիտասարդական փոխանակման ծրագրի շրջանակում մասնակից երիտասարդները ճանաչողական հանդիպում են ունեցել Խարկով քաղաքի երիտասարդական խորհրդի ներկայացուցիչների հետ, որի ընթացքում ներկայացվել են Ուկրաինայում երիտասարդական աշխատանքի ոլորտում իրականացվող փոփոխություններն ու հաջողությունները:


«Միջազգային երիտասարդական ուսումնասիրություններ» ծրագրի համակարգող, Երիտասարդական ակումբների դաշնության միջազգային քարտուղար Դիանա Եղիազարյանի խոսքով՝ փորձի փոխանակման այսօրինակ հարթակները շատ կարևոր են երկարաժամկետ ծրագրերի հաջողությունն ապահովելու համար։

«Մասնակիցներն այժմ զինված են նոր գիտելիքներով և հմտություններով, որոնք կարող են կիրառել սեփական համայնքներում, երիտասարդական ակումբներում երիտասարդներին ներգրավելիս»,- ասել է Եղիազարյանը։

Լյուբով Կոլդինան, ով ներկայացնում է ծրագրի գործընկեր և հյուրընկալող ուկրաինական Liberty Forum կազմակերպությունը, նշել է, որ շատ ուրախ են Խարկովում հյուրընկալել այսքան պայծառ երիտասարդների:


«Մարտահրավեր էր այն, որ շատերը ծանոթ չէին Ուկրաինային և հատկապես Խարկով քաղաքին, սակայն արդեն ծրագրի 4-րդ փուլում ենք և մենք ունենք ամուր կապեր երկարաժամկետ ծրագրի շրջանակում նախորդ փուլերի մասնակիցների միջև։ Նրանցից ոմանք արդեն շատ լավ ծանոթ են թեմային», - ասել է նա:

Երիտասարդական աշխատանքի առաջխաղացմամբ հետաքրքրված երիտասարդները Խարկովի կենտրոնում իրականացրել են ֆլեշմոբ՝ տեղացի անցորդների ուշադրությունը հրավիրելով երիտասարդական աշխատանքի վրա։

«Երիտասարդական աշխատանք. ի՞նչ է այն, ստուգեք #InYouS ծրագիրը» նախադասությունը գրավել է շատ անցորդների, որոնք իրենց հետաքրքրող հարցերի պատասխանները գտել են ֆլեշմոբի մասնակիցներին հարցուփորձ անելով։ Մասնակիցները պատրաստել էին QR գաղտնաբառեր, ժամանակակից թվանշային ներկայացում՝ անցորդներին տեղեկությունն ավելի արագ փոխանցելու նպատակով։

Առաջիկայում մասնակից երիտասարդները մշակելու են նաև տեղեկատվական արշավներ, որոնք կօգնեն հետագայում ավելի արդյունավետ դարձնել «Միջազգային երիտասարդական հետազոտություններ» հեռավար ուսուցման դասընթացը։

«Միջազգային երիտասարդական հետազոտություններ» ծրագիրն իրականացվում է Հայաստանի ամենամեծ երիտասարդական կազմակերպության՝ Երիտասարդական ակումբների դաշնության կողմից Եվրոպական միության ֆինանսական աջակցությամբ։ 5 փուլից բաղկացած ծրագիրը մեկնարկել է 2018 թվականի ապրիլին Երևանում, որից հետո ծրագրի շրջանակում ևս երկու միջոցառում է տեղի ունեցել. հուլիսին ծրագրի մասնակիցներին հյուրընկալել է Թբիլիսին, իսկ օգոստոսին՝ Պրահան։ Ծրագրի գործընկեր կազմակերպությունները 15-ն են ընդգրկելով մի շարք եվրոպական երկրներ՝ Պորտուգալիա, Ռումինիա, Բուլղարիա, Չեխիա, Թուրքիա, Բելգիա, Վրաստան, Մոլդովա, Ուկրաինա, Ռումինիա, Բելառուս, Շվեդիա, Հայաստան։

bottom of page