Երիտասարդական ակումբների դաշնության անդամ «Սոցիալական և երիտասարդական աշխատողներ» հասարակական կազմակերպության ծրագիրը հաղթող է ճանաչվել «Lifelong Learning Awards 2020» մրցանակաբաշխությանը:
«Կամավորական երիտասարդական աշխատանքի ճանաչումը որպես աշխատունակության գրավական» ծրագիրը լավագույնն է ճանաչվել «Սովորելը կարևոր է. հմտությունների ապագան» անվանակարգում:
Մրցանակաբաշխությունը կազմակերպվել էր Lifelong Learning Platform-ի կողմից:
«Lifelong Learning Awards» մրցանակաբաշխության (միջոցառման ձայնագրությունը կարող եք տեսնել այստեղ՝ 2։25։50 րոպեից) միջոցով LLLPlatform-ն ընդգծում է իր ստանձնած հանձնառությունը` նպաստելու կրթության և ուսուցման ոլորտում ստեղծարարությանը և ներառականությանը: «Lifelong Learning Awards»-ի նպատակն է նորարարական ուսուցման մոդելը, որն է՝ կրթություն ամբողջ կյանքի ընթացքում, տեսանելի դարձնել հանրային մեծ լսարանի համար:
Այս տարվա մրցանակաբաշխության թեման «Ցկյանս ուսուցումը կայուն հասարակությունների համար» խորագիրն էր կրում: Նման բացառիկ թեմայի համար հատուկ ժյուրիի կազմ էր հաստատվել։
Մրցանակաբաշխության հայտադիմումների քանակը 1200 էր՝ աշխարհի 32 երկրից, սակայն ընդամենը 3 անվանակարգերի համար հաղթող է ճանաչվել երեք ծրագիր:
«Կամավորական երիտասարդական աշխատանքի ճանաչումը որպես աշխատունակության գրավական» «Erasmus+» երկարաժամկետ
ծրագիրը մշակվել է «Սոցիալական և երիտասարդական աշխատողներ» ՀԿ և վերջինիս եվրոպական գործընկերների կողմից։ Այն նպատակ ունի բարձրացնելու կամավորական երիտասարդական աշխատանքի ճանաչումը հանրության և երիտասարդական ոլորտի գործատուների շրջանում՝ տեղական, տարածաշրջանային և ազգային մակարդակներում ճանաչելու և հաստատելու երիտասարդների կամավորությունը, ինչպես նաև զարգացնելու կամավորների հմտությունները և դրանք կապելու աշխատաշուկայի հետ ոչ ֆորմալ ուսուցման շնորհիվ ձեռք բերված ունակությունների և գիտելիքների վավերացման միջոցով:
Մենք ուզում ենք շնորհակալություն հայտնել LLLPlatform-ին և ժյուրիին Երիտասարդական ակումբների դաշնության անդամ կազմակերպության ծրագիրը բարձր գնահատելու և լայն ճանաչման արժանացնելու համար՝ նպաստելով կամավորական երիտասարդական աշխատանքին և երիտասարդական ոլորտի միջոցով ձեռք բերած կարողությունների վավերացմանը, ինչը հնարավորություն է տալիս երիտասարդներին դառնալու ցկյանս սովորողներ: