Վարդավառը համախմբման և մաքրագործման երիտասարդական տոն է. Գառնին կրկին միավորել էր տոնի սիրահարներին

Վարդավառը կամ Հիսուս Քրիստոսի պայծառակերպության տոնը Հայ առաքելական եկեղեցու հինգ տաղավար տոներից է, հայկական մշակույթի կարևոր բաղադրիչներից, որը յուրաքանչյուր տարի մեծ շուքով նշվում է Գառնիում և Գեղարդում: Նախաքրիստոնեական շրջանից Վարդավառը հայտնի է որպես վարդամատն Աստղիկ դիցուհու տոն: 

Երիտասարդական ակումբների դաշնությունն ավանդաբար կազմակերպում է Վարդավառ փառատոնը՝ համախմբելով ու խրախուսելով երիտասարդներին՝ տարածել ու պահպանել հայ ազգային, ավանդական ու հոգևոր արժեքները: Ըստ եկեղեցական տոնացույցի՝ տոնը նշվում է Զատիկից 14 շաբաթ կամ 98 օր հետո, կիրակի օրը՝ հունիսի 28-ից օգոստոսի 1-ն ընկած ժամանակահատվածում: 2024 թվականին Վարդավառը նշվեց հուլիսի 7-ին: 

«Արմենպրես»-ի փոխանցմամբ՝ Երիտասարդական ակումբների դաշնության նախագահ, Վարդավառ փառատոնի ղեկավար Ատոմ Մխիթարյանը նշել է, որ տոնի հիմքում Թաբոր լեռան վրա Քրիստոսի պայծառակերպ երևումն է.

«Ըստ քրիստոնեական հավատալիքների՝ մաքրագործված-աստվածացած մարդու իրական կերպն է, իսկ Քրիստոսի պայծառափայլ կերպարն անմեղ մարդու աստվածանման մաքրության այն գագաթն է, որն անցնում է մարդը հոգևոր սրբագործման առօրյա դժվարին ճանապարհով:Այսօր առավել, քան երբևէ կարևորվում է Վարդավառի տոնակատարությունները արժևորելը, որովհետև համախմբման և մաքրագործման ուղով պետք է անցնենք, երիտասարդներին ազգային, ավանդական ծիսակարգերին և մշակութային ինքնատիպ ժառանգությանը ծանոթացնենք, որպեսզի ինքնությունն ու հայկական արմատները ծլարձակեն»,- նկատել է նա: 

Փառատոնի հիմնական գործընկերը ՀՀ Կոտայքի մարզպետի աշխատակազմն է, որի ջանքերի շնորհիվ տոնակատարությանը միանում են Կոտայքի մարզի առաջատար ստեղծագործական և մշակութային խմբերն ու հաստատությունները:  

Աշխատակազմի մշակույթի և սպորտի բաժնի պետ, Վարդավառ փառատոնի մշակութային պատասխանատու Մարի Հովակիմյանը կարևորում է ավանդական դարձած Վարդավառի տոնակատարությունը. 

«Մեր մարզում երկու կարևոր մշակութային գանձարան կա. դրանք մեր պատմության արժևորման և ավանդույթների պահպանման հիմքում են: Երիտասարդական ակումբների դաշնությունը բոլորիս վարակել է վարդավառյան տրամադրությամբ՝ հետևողականորեն իրագործելով տարիներ առաջ մտահղացած Վարդավառ փառատոնի գաղափարը»: 

Գառնիի հեթանոսական տաճարում մասնակիցներն ականատես եղան Նոյ նահապետի, Աստղիկ դիցուհու և Վահագնի բեմականացված կերպարներին: 

Միջոցառման շրջանակում Նոր Հաճընի մշակույթի տան «Հաճըն» երգչախումբը ներկայացրել է կոմիտասյան շարան, Գառնիի արվեստի, մշակույթի և սպորտի կենտրոնի պարային համույթը՝ «Վարդավառ» պարը: 

Բյուրեղավանի «Ծիլք» ազգագրական համույթը ներկայացել է «Ծաղկաձոր» կատարմամբ և «Անձրևաբեր Նուրիի ծես, խնդումի ծես»-ով: 

Չարենցավանի քաղաքային գրադարանի «Շողեր» թատերախումբը բեմականացրել է «Տատիկից փախած ճամփորդները»՝ ըստ Հովհաննես Թումանյանի «Ճամփորդները» հեքիաթի: 

Տոնակատարությունը նշանավորվել է նաև ազգային պարերի ուսուցմամբ և ջուր ցողելու արարողությամբ: Գեղարդավանքում էլ երիտասարդության օրհնության կարգ է կատարվել։ 

Վարդավառ փառատոնն այս տարի բոլորին համախմբել էր ազգային, մշակութային երիտասարդական նախաձեռնության շուրջ, իսկ բազմաթիվ օտարերկրացիներ մասնակից են դարձել Գեղարդում և Գառնիում կազմակերպված տոնախմբություններին:  

Ըստ փառատոնի համակարգող, Հայկական Փի Ար ասոցիացիայի նախագահ Աստղիկ Ավետիսյանի՝ փառատոնի կարևոր առաքելությունը հայկական մշակույթի հանրահռչակումն է, երկրորդ՝ երիտասարդության շրջանում ազգային-հոգևոր արժեքների պահպանումն ու տարածումը, երրորդ՝ Հայաստանի զբոսաշրջային գրավչության մեծացումն ու Հայաստան-Սփյուռք կապերի ամրապնդումը»: 

Փառատոնին աջակցում են Համաշխարհային հայկական երիտասարդական Ոստայնը (WostAYN), Հայկական Փի Ար ասոցիացիան և Գառնու համայնքապետարանը։ 

Published by Armenpress, original at https://armenpress.am/hy/article/1195250?fbclid=IwY2xjawKb-pBleHRuA2FlbQIxMQBicmlkETFkUDluUHducVR5YXFFQjFkAR7hbsqwSIu5R-zI53XGTCOiCXzHYP0uzpXEd-JpUTjAPak9E-dH-M1k4mKIOg_aem_e7NKHT0hkTfLjUqfIYsWGQ