Ամենայն Հայոց Գարեգին Բ հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր և պատահական չէ, որ Երիտասարդական ակումբների դաշնությունն արդեն ավանդույթ է դարձրել այս տոնի ամենամյա յուրօրինակ ձևով նշելը: ԵԱԴ-ն, համագործակցելով Արարատյան Հայրապետական թեմի հետ, այս տարի տոնին նվիրված միջոցառումն իրականացրեց առաջնորդարանի դահլիճում:

«Հավատարիմ մնալով ազգային հոգևոր ավանդույթներին՝ Երիտասարդական ակումբների դաշնությունը յուրաքանչյուր տարի մեծ ոգևորությամբ է սպասում տոնին և նշում է այն երիտասարդների հետ Երևանում և Հայաստանի բոլոր մարզերում,որտեղ գտնվում են ԵԱԴ մարզային կենտրոնները։Կազմակերպությունում շատ զույգեր են ձևավորվում և յուրաքանչյուր տարի Սուրբ Սարգսի տոնը առիթ է հանդիսանում,որպեսզի այդ զույգերը սիրո խոստովանություն անեն մեկը մյուսին։Ուզում եմ շնորհակալություն հայտնել բոլոր երիտասարդներին այս հրաշալի տոնը ազգային հոգևոր ավանդույթներին համապատասխան նշելու համար և կոչ անել, որպեսզի սա ևս մեկ առիթ հանդիսանա երիտասարդներին ակտիվանալու և սեփական նախաձեռնությունները կյանքի կոչելու համար։Շնորհավորում եմ բոլոր երիտասարդներին այս հաճելի և սիրառատ տոնի առթիվ»,-լրատվամիջոցների հետ հարցազրույցում նշեց Երիտասարդական ակումբների դաշնության նախագահ Ատոմ Մխիթարյանը։

Միջոցառումն իր բացման խոսքով սկսեց Երիտասարդական ակումբների դաշնության նախագահ Ատոմ Մխիթարյանը, ապա Տեր Եսայի քահանա Արթենյանը ներկայացրեց տոնի խորհուրդը և ժողովրդական ավանդույթները: Տոնակատարությունն ուղեկցվում էր «Հայասա» ֆոլկ բենդի գեղեցիկ կատարումներով: «Տերյան» մշակութային կենտրոնն էլ հարսանեկան տարազները և դրանց առանձնահատկությունները ներկայացրեց: Սիրո պակաս չկար, քանի որ միջոցառումը համեմված էր խոստովանություններով և առաջարկություններով: Խրախուսելով համարձակ զույգերին՝ ԵԱԴ-ն հովանավորների կողմից տրամադրված նվերներ հանձնեց նրանց: Տոնակատարության վերջում ներկաներին բաժանվեցին նախորդ օրը կամավորների կողմից պատրաստված աղի բլիթներ: Միջոցառման ֆորմալ մասը իր տեղը զիջեց ոչ ֆորմալին, որը ընդգրկում էր ինտելեկտուալ, հետաքրքիր և զվարճալի խաղեր սիրահար զույգերի մասնակցությամբ: Հաղթող ճանաչված զույգերը ևս պարգևատրվեցին նվերներով:

Միջոցառման կազմակերպման գործում իրենց մեծ ներդրումն ունեցան Երիտասարդական ակումբների դաշնության նախագահության,քարտուղարության անդամները և ակտիվ կամավորները: Նախաձեռնության կազմակերպիչներն են Երիտասարդական ակումբների դաշնությունը, Արարատյան Հայրապետական թեմը, «Հայկական Փի Ար ասոցիացիա» գիտատեղեկատվական ՀԿ-ն և Համաշխարհային հայկական երիտասարդական Ոստայնը:

Միջոցառմանը աջակցեցին «Armenian Tours» տուրիստական կազմակերպությունը, «Տերյան» մշակութային կենտրոնը, «Հայաստանի գանձեր» խանութ-սրահը, «Apricot» հուշանվերներ և զարդեր արտադրող ընկերությունը, «Փողոց Պարադի 588» հրուշակեղեն թողարկող ընկերությունը և «Ranidi» աքսեսուարների օնլայն խանութը։

Իսկ եթե դուք չեք հասցրել մասնակցել ԵԱԴ-ի կողմից կազմակերպված Սուրբ Սարգիս տոնին նվիրված միջոցառմանը, հոգ չէ, սպասում ենք ձեզ մյուս տարի: