Երիտասարդական ակումբների դաշնության մարզային երիտասարդական աշխատողները ներկայացրել են Հայաստանի տարբեր մարզերում գործող ԵԱԴ երիտասարդական ակումբները՝ Արագածոտն (Անդրանիկ Հարոյան եւ Ինեսա Շահազիզյան), Լոռի (Սոխակ Մելքոնյան), Վայոց Ձոր (Հայկ Հարությունյան), ռումինական Սիբիել քաղաքում անցկացվող «Երիտասարդական աշխատանքը՝ որպես արմատականության և բռնի ծայրահեղականության կանխարգելող» խորագրով դասընթացին: Փորձի փոխանակման և հմտությունների ձեռքբերման միջազգային դասընթացը կայացել է օգոստոսի 8-11-ը ։

Դասընթացավարների համար կազմակերպված ծրագիրը նախաձեռնվել է ԵԱԴ-ի միջազգային գործընկեր կազմակերպության՝ Եվրոպական երիտասարդական ակումբների համադաշնության (ECYC) կողմից՝ «Երիտասարդական աշխատանքը՝ որպես կանխարգելիչ պրակտիկա» ամենամյա աշխատանքային ծրագրի շրջանակում: Դասընթացի կազմակերպչական թիմում ընդգրկված էր նաև ԵԱԴ-ի միջազգային քարտուղար և ECYC բյուրոյի անդամ Դիանա Եղիազարյանը:

Միջազգային ծրագրի հիմնական նպատակների թվում էին բռնի ծայրահեղականության և արմատականության կանխարգելման գործում երիտասարդական աշխատանքի դերի բարձրացումը, դասընթացավարների հմտությունների և կարողությունների զարգացումը՝ նպաստելով այն նախագծերի իրականացմանը, որոնք ուղղված են բռնության ծայրահեղականության և արմատականացման գործընթացների կանխարգելմանը, ինչպես նաև երիտասարդական աշխատողներին անհրաժեշտ միջոցների տրամադրումը՝ տեղական նմանօրինակ ծրագրերի իրականացումը դյուրացնելու նպատակով։

Նախքան այս դասընթացի մեկնարկը ծրագրի մասնակիցներն արդեն ստացել էին թեմատիկ և հիմնարար գիտելիքներ՝ լրացնելով 12 մոդուլից կազմված զանգվածային բաց, առցանց դասընթացը (MOOC)։ Ծրագիրը տրամադրել էր հիմնական գիտելիքները, որոնք Սիբելում առավելապես փորձի միջոցով կիրառական բնույթ են ստացել։

Դասընթացը կազմակերպվել է բավականին ինտենսիվ և ինտերակտիվ. մասնակիցները 4 օրվա ընթացքում կարողացել են ծանոթանալ բնագավառի հիմնական տարրերին և հասկացություններին, անցկացրվել են նաև թեմատիկ քննարկումներ փորձագետների մասնակցությամբ:

Վերապատրաստման նպատակով երիտասարդական աշխատողները եզակի փորձ են ձեռք բերել՝ ստանալով մի շարք գործիքներ, հմտություններ և ձեռնարկներ՝ իրենց ապագա ծրագրերն ավելի արդյունավետ զարգացնելու համար։ Դասընթացի առանձնահատկություններից մեկն էլ այն էր, որ Եվրոպայի տարբեր երկրների մոտ 25 մասնակիցներ սեփական գործիքներով և փորձով փոխանակվելու հնարավորություն են ունեցել:

Դասընթացի հիմնական արդյունքը և շարունակականությունը ապահովելու համար ծրագրի մասնակիցները մշակել են նախագծեր, որոնք առաջիկա երկու ամսում պետք է իրականացվեն արդեն ազգային մակարդակով: Հայաստանի 4 երիտասարդական աշխատողը ևս կազմակերպելու են տեղական ծրագիր արմատականության և բռնի ծայրահեղականության կանխարգելման թեմայի շրջանակներում: