• Black Facebook Icon
  • Black YouTube Icon
  • Black RSS Icon

© Federation of Youth Clubs of Armenia - 2016

Designed & Made by Armenian PR Association
www.ArmPR.org

 FEDERATION OF YOUTH CLUBS OF ARMENIA 

Search

Միայն համատեղ ջանքերով է կարելի կանգնեցնել պատերազմները. Ատոմ Մխիթարյան



Օգոստոսի 15-ին Հայաստանի ամենամեծ երիտասարդական կազմակերպության՝ Երիտասարդական ակումբների դաշնության (FYCA) նախաձեռնությամբ, Երևանում մեկնարկեց «Կոնֆլիկտների ազդեցությունը շրջակա միջավայրի վրա» միջազգային երիտասարդական ծրագիրը։ Ծրագրին մասնակցում է ավելի քան 40 երիտասարդ 10 երկրներից (Հայաստան, Հունաստան, Թուրքիա, Վրաստան, Իսպանիա, Ավստրիա, Ուկրաինա, Ռուսաստան, Սլովակիա, Ռումինիա, Բելառուս)։

Միջազգային ծրագրի նպատակն է միավորել նախկին կամ ներկա կոնֆլիկտային գոտիներում ապրող երիտասարդների, որոնք մտահոգված են աշխարհում մարդասիրական աղետների վերացմամբ, շրջակա միջավայրի պահպանությամբ, և սևեռել նրանց ուշադրությունը իրենց համայնքներում միջազգային կոնֆլիկտների մասին իրազեկվածության բարձրացման գործի վրա։ Ծրագիր-դասընթացը եվրոպական տարբեր երկրներից ժամանած երիտասարդների համար նաև լավ հարթակ է՝ իրենց երկրում կոնֆլիկտի առաջացման և դրա հաղաթահարման պատմությունը ներկայացնելու համար:


ԵԱԴ-ի նախագահ Ատոմ Մխիթարյանի խոսքերով՝ տարբեր երկրներից ժամանած երիտասարդների համար շատ կարևոր է հասկանալ, որ միայն համատեղ ջանքերով է կարելի կանգնեցնել պատերազմները և նպաստել խաղաղաշինության գործընթացին։ «Պատերազմների թողած հետևանքները շրջակա միջավայրի վրա կարելի է չեզոքացնել միմիայն միացյալ ուժերով՝ վերանալով երկրների քաղաքական սահամաններից, և այդ սահամանների երկու կողմերը կապող համագործակցության կամուրջներ ստեղծելով»,-ասում է Ատոմ Մխիթարյանը:

Ծրագրի առաջին երկու օրերին մասնակիցներին ներկայացվեցին դասընթացի հիմնական նպատակներն ու դրա կարևորությունը շրջակա միջավայրի պահպանման և կոնֆլիկտների բացասական ազդեցության արդյունավետ չեզոքացման գործին երիտասարդներին ներգրավելու համար: Մասնակիցների ակտիվ ներգրավմամբ տեղի ունեցան մի շարք կառուցողական քննարկումներ` ճգնաժամային իրավիճակներից ելքեր փնտրելու և պատերազմական աղետների հետևանքների արագ վերացման ուղիների մասին:

Իսկ արդեն այսօր միջազգային դասընթացի մասնակիցները եղան Հայասատանի երկրորդ մայրաքաղաք Գյումրիում, որտեղ հանդիպեցին տեղի հասարակական-երիտասարդական կազմակերպությունների ներկայացուցիչներին և ծանոթացան նրանց դերին ու գործունեությանը քաղաքացիական հասարակության ձևավորման և մասնավորապես` բնության պահպանության գործում: Ծրագրի վերջին օրը` օգոստոսի 20-ին, տեղի կունենա հանդիպում նաև ՀՀ Բնապահպանության նախարարի հետ:

Կարևոր հիմնախնդիրների շուրջ քննարկումների և դրանց մասին նոր գիտելիքներ ձեռք բերելուն զուգահեռ` եվրոպացի մասնակիցները հնարավորություն կունենան նաև վայելելու Հայաստանի հրաշալիքները, այցելելով Խոր Վիրապ, ինչպես նաև զգալ երևանյան ակտիվ և գունագեղ երեկոների շունչը քաղաքի տեսարժան և ժամանցի վայրերում: